A u Vodicami, Dalmaciji, Rvackoj i u dosta svita mnogi našu Julijanu već znaju po tom njezinom pisanju i ta njezina lipa štiva rado čitaju. Nego, šta se tiče našeg kraja, ona je ovdi pari fetive, oš Vodiška, Prvinka, Šepurinka, Luška oli istinska zaljubljenica u more i vapore, a posebno „Tijat”, u koji se često na šepurisnkim mulima i rivama doli u Trstevici zagledavala dok je još naš vapor svoju điradu arhipelagon činija. I u tom zanosu vonja friškine sa šepurinskih žala, mirisu murtele, levande i drugog otočnog cvića, nastala je u šetemanu dan ta njezina poznata stvar „Stoji ti put”.

A eto, Julijana već dvajset godin nije skrenila sa tog svog omiljenog puta zvanog Vodice i otok Prvić. A šta reć nego, čini mi se ista ka Oliver, koji bi pored Splita, Korčule, Vela Luke i cilega svita doša u Šepurinu guštat i svoja poznata dila stvarat, ka onaj spot za pismu „A kad mi dođeš ti”, ki je snimija isprid crikve sv. Jelene na šepurinskoj rivi, a vidilo ga je ni manje ni više nego 41 miljun svita. E, to je ta Julijanina čarobna i šesna Šepurina, koja čuda čini od vridna i nadarena stvaralačka svita! A onda i ona, naša vodiška, gre sama drito naprid, ravno, i ne obazire se na Akademije. E, to isto tribaš znat – kad gas dat, a kad fermat. A Julijana je pokazala da sve zna i sa svime se nosit more, jer voli more koje je forcu daje i pomaže knjige pisat.

I za kraj još jedna stvar. Nisan vidija naš turistički svit ove godine na ITB u Berlin, ali vidija san Vodice u Austriji. Lipo, nima šta – ista je to stvar. I dok novine pišu kako nas Merikanci sa top destinacija brišu, ma nima zime jer Melanijini Slovenci bez nas ne mogu. Ljubo mi doli u portu kontreštaje da će turisti biti i da će nas ovo lito umisto Merikanci više Kinezi posjetiti. A ki im brani, šoldi su šoldi. Virovatno bi se s time složija i šjor Duje.

On za turiste nima straja. Srija san ga u Dalmare u jednoj butizi namještaja. Nove postelje je za goste kupova i šušte isporovava. Ono u sebe u apartmane uveja box madrace (štramce). Da bi ga na licu mista isprova, na jedan štramac se bacija i vidija da je u pravu bija kad je taku dobru stvar za turiste kupija. A kako će tek gosti guštati na novoj box posteji, morat ćemo poć ovo lito kaku anketu bacit.

Paško