Da se oni imaju di igrati, a ne drogirati, pa će onda zdraviji svit na njima ostati. Vodice taku dvoranu i zaslužuje, s obziron na svoj svakaki značaj, oš turistički, oli pulitički.

Lipo je naš gradonačelnik, šjor Ante, reka na otvorenju kako je cili sritan. A kako i ne bi bija, kad je grad taku dvoranu dobija, pa je svit razloga za feštat puno ima u novin vodiškin sportskin dvorima. A morat ću se i ja koji dan okušat u taj Skate park, jer govoridu da je najveći u Rvackoj. Samo me straj kad bi na kaki karić sta, da se ne bi bidan cili morebit slomija, jerbo kosti nisu više mlade da bi tako lako zarasle. Ali mora bi i prije starta balinjere prominit.

Pored take šesne nove dvorane, iznenadila me još jedna stvar, jerbo nisan zna da naš župnik tako dobro more i košarku igrat. Zna san da dobro mise i predike drži, ali da tako dobro trice i slobodna bacanja baca, nisan ni na kraj pameti sanja. E, eto opet, Bogu fala, jer bar sad znan kome ću se javit ovo lito za basket zaigrat. U Račicama, more i jedan na jedan, samo bi mora izbjeći nekako ta slobodna bacanja, koje župnik profi baca.

A kad nan sve već tako dobro gre, nisan moga a ne osvrnit se na još jedan lipi događaj, ki je proteklih dan selo zabljesnija. Ono da je barba Ante sa svojon šjoron, ni manje ni više nego 70 godin zajedno učinija. A šta reći na to, nego čestitan i svaka čast, velika je to stvar i jubav, kada svit tolike lipe godine zajedno izdura. Lipota i divota sve je to na jednom mistu kad se ljudi slažu i vole, a ne kad gledan danas, mladi ne mogu ni sedan godin skupa izdurat, a kamoli 70. E, e, vrimena su druga, toliko se urotila protiv čovika i Boga. A štaš, živit se opet nekako mora.

Lip pozdrav - PAŠKO