I sinoć je tako bilo na rivi se guštalo, ilo i pilo do kasno u noć. Za svakoga je nešto lipoga bilo, a do 11 uri nije ničega zafalilo. Pitan doli ribare stare  i meštre iz „Porta” prave ,  kako je to bilo da ničega nije zafalilo pa mi jedan od njih kaže, da su u pitanju dvi stvari stare. Ili se sinoć ribe puno ispeklo ili je svita manje bilo. Ali vidin nije svita manje bilo, riva je bila puna ka šipak u to san se uvjerija sam. I restorani su bili puni svi, doli u portu oboritu ribu u vitrini, u „Burina” vidin. 

Vidin ribari uslužni, srdele i pidoće dile na sve strane, dok svit pored njih điraje, a drugi side na sve strane doli po kantunima zidi. Bilo je veselo i lipo, više nego dobro za prvu ribarsku feštu ovega lita. Šta će tek biti kad još navali furešta svita? 

A ove večeri vidim pivalo se i plesalo na sve bande. Najbolje su bile dvi šinjorine plave. Zavrtile se tuta forca i dobro da nisu u more pale. A šta da kažen i ja iden popiti čašu bilega. Ne virujen da je bolje nego u šjora NIKE, ali eto lipo je. I dok su gosti uživali oko ribe i  uz muziku kraj bine, sinoć je misec u portu bija prava atrakcija. Dok su ga šjore sa puno kriancije i romantike slikivale na sve bande, onako pomalo uvatija san ga i ja, i njih kako drže mobitele iznad glave u rukan. 

Bogu fala, nakon onog Saharskog salbuna da nam je misec kaki triba biti provirija i skala se u provinju kalala, pa je bilo lipo i ovu noć spati.

Lip pozdrav sa rive PAŠKO !