Paškina ćakula: Maslinovo uje tribalo je 30-40 euri biti

Sićan se prošlih godin kako je svit kuka i govorija da nima ništa od maslin, sve se osušile, stabla ogulila, usahnit će, nisu ništa rodile, maslinovo uje bit će 30-40 euri.  

Istina tija mi ga jedan doli na otoku ovo lito prodat za dvajset eura, ali onda san skuža da je odlično, ako ne i bolje ono vodiško za petnajest eurića.

A ove godine sasvin druga stvar. Sva stabla pucaju od maslina, a čini se kada u svakoj ima dvajset deki. I virujen da neće biti ono maslina je neobrana i da će je svi brati, i još više ulja imat.

A cina bi se mogla i kalati na desetak eura, ako Bog da.

Pa i da „mali” čovik more više maslinova uja kušat. A ne ga ka likariju duperavat (koristit).

A onda će i makine za misec, dva morat dan i noć raditi, a mogle bi se i kamenice opet u modu vratit.

Jer di uje bolje čuvat nego u kamenu, u kome i maslina najbolje reste. Samo tribat će ih prije dobro zatvorit, jer bi se i kakav miš moga u uje utopit, ako se zaboravi pokrivalo metnit.

Sićan se prije kad bi se stariji ljudi guštali jedan drugomu narugat govorili bi da je isti ka miš iz ulja. Jer kad bi zaboravili kamenicu zatvoriti zna bi se i miš u ulje kalat i utopit.

A kakvo je posli bilo uje pitaj dragog Boga i ko bi ga moga više takvog ist.

Nego kad je već toliko maslin bit će i puno ulja, pa niko i neće titi više murku sa traulika kupit.

To je prije bilo u modi kad su se masline činile i konji vukli žrvanj. A onda velike torbe s tiston od maslin punili i u traulik ih mećali stiskati. I sve je nekako onda ka slađe bilo i masline i ulje.

A tako je to, jer maslinovo uje najbolja je likarija, a ja ga volin najbolje poist uz ribu i slane srdele, pa se i veselin friškome uju šta će uskoro iz mašina iscuriti. Ali moja Šjora koja nije s mora ne voli maslinovo ni ribu, ona voli više odojka i janjetinu poist. Pa neka joj je uslast! A ja moje maslinovo uje nikome ne dam.

PAŠKO