U „Našen malon mistu”: Škuro selo i šjore bez šugamana

Ona šesna Šjora sa Srime ča je prošlo lito gradonačelnika našega Šjoroga Antu u gradsku upravu zvala zbog svojih šugamana, sad ga čini mi se, nije zvala kad su druge šjore i šjori ovih dana dolika na Lovetovu ostali bez svojih ležaljki i šugamana.

E, naučila se prošle godine lipa šjora pameti, pa ove nije ostavila na moru svoje šugamane. Ali zato su ih ostavili drugi za sve svoje goste i apartmane, zauzeli na vrime cile rive, plaže i vale. E, ko in šta more. E, more, more  naši komunalci pokupiti, pa u grad odniti. onda ako ih žele nazad dobiti morat će i lipe kazne od 260 euri platiti.  E, pa sad volija bi vidit onoga ko će ih iti uzeti? I ko je na plaži ostavija kakih kvalitetnih stvari? Najbolje je prošla jedna  šjora šta je dolika na plažu mećala jednu staru šćavinu ča je još od pokojne none  ostala, cilu izbužanu od moljaca.

A bilo je vidin i nekih katriga i lježaljci za spat, pa valja vidit, ako se vlasnici ne jave, po kojoj cini će ih grad prodat. Tribalo bi ih na kaciji čapat. A jutros vidin doli  u 7 uri ujtro dok po Srimi i Lovetovu gren, ćuti se ka neka milina kako šugamani nima, i koliko mista za potrebiti svit i turiste sada ima.

Ali nije samo to šta nas je ovo lito čapalo. Sinoć je struje u selu nestalo. Oko jedanaest uri u selu mrak, škuro, škuro  ne vidiš ništa isprid oka. S ponistre se ne vidi Šepurina ni Kaprije, ni Punta, Imperial, Olimpia Skaj, i čini se kada cilo selo gre spat.

Letrika se ugasila, mašine stale, kase zablokirale. Šćerike nema ni za lik, a da ne govorin o feralima i perolejki. Najteže je bilo konobarima u mraku raditi i svu spizu gostima naplatiti. Onaj koji nije dobro pamtija, oli na blok pisa, pitaj dragoga Boga kako je proša. Bit će da je bez šoldi i inkasa osta.

Ili su naši lipi i pošteni gosti sami izračunali koliko bi konobarima morali dati, pa in dali. A šta drugo nego viruj u jubav i da još poštena svita na svitu ima!!! 

Pozdrav iz sela PAŠKO!