PAŠKINA ĆAKULA: Da je morski pas bija, Stipe bi ga prvi vidija

Nima ko nije u Rvackoj proteklih dan za to sazna kako se u Vodice, doli ispod Punte na plažu, skala pravi pravcati  morski pas.

I to niih ni manje ni više nego dva. Mediji požurili tu vist javiti, mislili valjda kako će hrvatski turizan na tome štogod dobiti, oli i možda turiste iz ralja opasnih pašćurina isčupati. Niko nije prave ljude na kaki Institut zva i kod njih se raspita. Ali naš urednik Pere na info Vodice se sitija stručnjake iz Splita kontaktirat. A oni kažu da nisu bili morski pasi, nego samo veliki igluni, oli još bolje tunese malo na plaži zaigrale. Onako malo pridvečer kad su se turisti smirili, igluni i tune onda svoj šou bacili, ka ča znaju dupini. 

I ko in to more zabraniti svit malo zbunit i po svemu sudeći dobro se zabavit. Ma odma san reka ja da nije bija morski pas, jer da je bija pravi pas prvi bi ga Šjor Stipe iz „Divinga” Vodice dolikan vidija. Jer on je pod moren po cili Božji dan i sigurno taj mu detalj ne bi uteka. A ovako najbolje je proša Tik Toker ki je s klikovima šolde zaradija i turiste pristrašija.

A danas je to najvažnije ljudima straj u kosti utirat, kako ne valja ono, kako ne valja ovo i da neće biti dobro.

A moj Šjor IVE doli na Lovetovu,, na samom moru u svon dvoru gušta i ničega se izgleda nikada u životu nije boja. I zato je uspiha u turizmu puno uvatija. E, svaka mu čast! Kako mi govori s tin poslon se bavi više od trejset godin i nima šta nije vidija i doživija. Pomalo, čini mi se, da se turizma ka zasitija i sada bi se najradije na DIDOVINU u svoju Prominu vratija. U miru za svoju dušu provoditi lita dalje od ove gužve i furešta svita. A vidin koliko i danas puno volje za ugodit gostu  ima i zbog toga je u turizmu uspija. Nisan ga o tome pita, ali znan da se ni morskog pasa Šjor Ive ne bi poboja, a kamoli kakog Igluna oli tune, šta je malo u moru poskočila.  Naučija je on svaki dan sa svoje ponistre gledat u more i onu lipu prvu valu punte Šepurine.

Lipi pozdrav iz sela PAŠKO !